2021.2.21第五擺228‧0紀念行動——拆除威權.起造新台灣

「228‧0紀念行動——拆除威權.起造新台灣」

行動時間:2021.02.21(禮拜)下晡1:30 日新國小集合 下晡2:28 天馬茶房起行

2 月 21 號、禮拜下晡、50 外 ê 民間團體閣一擺集合、發起第 5 擺「228・0 記念行動」、呼籲所 有人民行上街頭、做伙思考 228 大屠殺帶乎咱台灣 ê 痛疼、同齊治療咱歸个社會上深 ê 空嘴。以 「拆除威權・起造新國家」​做核心價值、訴求徹底清算中國國民黨 kap 相關勢力、鬥陣建立自 由・民主・台灣新國家 ê 決心。

2017 年、由蔡瑞月舞蹈研究社 kap 鄭南榕基金會共同發起、綴 1987 年陳永興醫師、李勝雄律師 kap 鄭南榕先生發起「228 公義和平運動」ê 脚跡、招逐家做伙行出來、莊嚴來面對咱台灣歷史 ê 眞相。

今年、由台大台語文社 kap Formosa青年議會籌備處主辦、台灣人權促進會・親子共學教育促進 會・人權公約施行監督聯盟・東吳難容社・台大學生會......等等 50 外个關心打拼自由民主人權價 值 ê 人民團體 kap 學生組織協辦、閣一擺招人民鬥陣來行台灣 chit 條建國路。
今年 228・0 辦 tī ​世界母語日​、以​「拆除威權・起造新國家」​做核心、由​現任台大台語文社社長林 柔辰起草宣言​、以伊 ê 母語・台語來寫出咱 chit ê 世代 ê 醒覺。點出中華民國政府對台灣社會造 成外深ê傷害——咱不nā失去足多足多勇敢ê台灣人ê性命、咱ê語言・咱ê歷史・咱ê記 池・咱 ê 靈魂 mā lóng hông 奪去。

Chit 擺行動宣言 beh 強調、一定愛​「徹底清算中國國民黨 kap 相關勢力」​、包括​「刪除維持植民 威權象徵 ê 預算(中正廟・慈湖陵寢等)」​。Ánne 台灣社會 chiah 通 kā 真相看乎清楚、誠實來 認bat 中國國民黨 kap 中華民國 chit ê 黨國體制致使咱受傷有外深、轉型正義 chiah 有可能真正開 始。​追求獨立建國 ê 台灣、mā 愛 ē記反抗中華民國 ê 經驗、kah 香港・TIBET・East Turkestan ・世界各國結盟、做伙對抗危害全世界 ê 中國病毒 kap 中國帝國主義、開創自由民主 ê 未來。

228・0 按算行過相關歷史地點、tùi「天馬茶房」出發、經過「專賣局台北分局」・「台北放送 局」、上尾到 228 大屠殺 ê 起點——「行政長官公署(行政院)」。遊行過程 ē 用台語 kap 客語 讀受難者名單。行政院頭前 ê 儀式 ē 用​「手語念詩」來讀陳明仁老師「1947 寒冷 ê 春天」​、希望 用「無声」來表達受難者・家屬甚至歸个台灣社會「袂赴哭 ê 心声」。閣有行動宣言起草人林柔 辰來 hoah 出 chit ê 世代 ê 追求。Mā 邀請​李勝雄律師​來講歷史、​林宗正牧師​ chhōa 逐家做伙爲台 灣祈禱、咱做伙 siohsioh 咱流血 ê 靈魂。以蔡瑞月舞蹈社 ê​「長春花」舞作​邀請群眾參與收尾、期待台灣人 tùi 苦難 ê 記池開出上水 ê 花蕊、天光 hit 工、台灣是新閣獨立 ê 國家。

面冊228‧0紀念行動- Home