成大蔣為文教授獲陳文成基金會頒發台語文教育獎
國立成功大學台灣文學系主任蔣為文chhui-sak台語文教育30冬，今年得tio̍h美國「陳文成教授紀念基金會」頒發台語文教育貢獻獎，伊是教育類唯一得獎人。頒獎典禮分別tī10 月30 kap 11月初6分二場tī線頂台美同步進行。前文化部長鄭麗君、立委林昶佐、基進黨主席陳奕齊等來賓lóng應邀出席線頂頒獎典禮。
蔣為文是美國德州大學語言博士，現任國立成功大學台灣文學系系主任、「台文筆會」秘書長， 前「台灣羅馬字協會」理事長。大學時代就參與台語文運動， 是「學生台灣語文促進會」幹部。留美期間積極參與「台灣學生社」chhui-sak 白話字，投稿台文通訊。回台創立「社團法人台越文化協會」， 推動台越國民外交， 設立「成大台灣語文測驗中心」、「成大越南研究中心」， 研發koh chhui-sak 「全民台語認證」、「國際越南語認證」， 出版「語言， 認同與去殖民」、 「語言， 文學kap 台灣國家再想像」、 「民族， 母語kap音素文字」、「喙講台語 手寫台文」等專冊。
美國「陳文成教授紀念基金會」自1982年成立以來， 推廣台灣語言文化， 鼓摧台灣主體價值， 設立「社會關懷獎學金」，鼓勵青年學生用實際行動關懷台灣社會，已經有大成效。這幾冬來台灣少年人開始關心傳承台灣民族語言文化ê議題。今年是陳文成受害40週年。 「陳文成教授紀念基金會」得著「台語文化大使命基金」ê贊助，特別舉辦「台文通訊30冬紀念獎」活動，紀念海外創刊ê台文通訊，追求台灣政治經濟語言文化平等ê精神，按算 tī美國感恩季節，頒發7個代表無仝領域ê「台文通訊30冬紀念特別獎」：1) 專業人士貢獻獎2) 資訊工程貢獻獎3) 台語文教育獎4) 弱勢文化關懷獎5) 草根運動獎6) 社區服務獎7) 科技運用貢獻獎，來表揚in tùi台灣語文運動無私ê奉獻。每一項「台文通訊30冬紀念特別獎」10萬台票。希望這個頒獎活動tùi台灣文化復興kap轉型正義有所幫贊。今年得獎者分別是：
專業人士貢獻獎：吳宗信
台語文教育獎：蔣為文
弱勢文化關懷獎：鄭雅怡
社區服務獎：陳豐惠
草根運動獎：陳明仁
資訊工程獎：楊允言
科技運用獎：吳家銘
蔣為文教授領獎感言全文：
我hām台語文教育ê緣份
真感謝世界台灣文化論壇kap陳文成教授紀念基金會對我30冬來從事台語文教育ê肯定hām鼓勵。Che是我第二擺ùi陳文成教授紀念基金會手頭領獎。頭擺是我tī美國讀博士hit chūn，基金會頒獎學金贊助我博士論文做台越比較研究。
實在講，我讀大學以前是ǹg-bāng做科學家ia̍h-sī發明家，só͘-pái大學是讀機械系。是án-chóaⁿ後來ùi機械系轉來語言文學ê研究？Che hām我大學時代創立淡江大學台語文社，參與台語文運動有關。我tī 1990年9月入去淡江大學讀冊。隔tńg年正式成立學生社團台語文社，由我擔任頭任ê社長。Hit chūn iáu無台文系，學校mā無開任何hām台語文有關ê課程。Só͘-pái台語文社tiāⁿ以讀冊會、演講、座談ia̍h-sī營隊ê形式來進行。有一擺意外ê因緣，我tī前衛出版社熟似陳豐惠hām陳明仁。In hit chūn 借前衛ê所在teh負責台文通訊tī台灣發行ê事工。透過in，我熟似khah-chē社會上ia̍h-sī其他學校ê台語文社。
原底我iáu毋是真確定大學畢業liáu beh轉行無。M̄-koh後來發生一件代誌hō͘我決心改讀語言學kiâⁿ研究推廣ê路線。He是1995年tī台大辦ê台灣語言國際研討會。Hit chūn阮一陣台文社ê有志真歡喜相招去參加研討會。逐家想講真歡喜總算有語言學家beh關心台灣語文ê死活。想bē到大會soah禁止阮tī會場用台語ia̍h-sī客語問問題。In講he是國際研討會，ài用Chinese ia̍h-sī English發言。逐家chih-chàn bē-tiāu sûi kā大會抗議。Hit暗我sûi寫一首詩「十字架頂頭ê老鼠」，mā決定beh改讀語言學thang對hit寡無台灣心ê語言學家chhiàng聲。Chit首詩是án-ne：
我看tio̍h一隻老鼠倒tī十字架頂頭
Ngia̍uh-ngia̍uh-chun
假使我註定愛接受死神ê召喚
Kám tio̍h成就恁ê地位?
Tī恁閃晰ê手術刀下
無法度thí開目睭
Kan-taⁿ
Ngia̍uh-ngia̍uh-chun
做最後ê抗議!
我看tio̍h一隻老鼠倒tī十字架頂頭
Ngia̍uh-ngia̍uh-chun
假使我料會tio̍h悲劇
悲劇毋是死亡
是死亡前ê侮辱
上尾，koh一擺感謝世界台灣文化論壇kap陳文成教授紀念基金會頒發台語文教育獎hō͘我。Mā感謝我ê爸母hām兄哥，in長期來支持hām贊助我從事台語文ê研究hām教育ê khang-khòe。勞力！台語出頭天！
回應文章建議規則：