向台籍兵獻詩-還阮一個名-

還阮一個名　　　2009/10/21 黃旭初

阮的名是阿爸阿娘給我號
阮的身軀是爹娘的一塊肉
阮是一粒欲落土的蕃薯子

少年從軍出戰為啥代
說是為國光榮來出征
阮是一粒台灣蕃薯子
但是從來沒人來關懷

聽到槍聲砲聲阮會驚
轟火連天看到蓮花影
想到阿娘阿爹給阮疼
另日未當來給爹娘晟
阮是一粒台灣蕃薯子
流血流汗憨憨替人拼
阮的戰死倒底為啥代

也有少年呼人騙
送去中國打內戰
軍衫換了二三遍
未知自己叨一邊
青春原是這美麗
可嘆戰死在外地

少年為國來戰死
無死返來亦半死
攏講祖國若厲害
祖國攏無真心待

戰爭由來全無奈
阮有青春阮有愛
就是戰死在天涯
嘛要返去阮的愛

阮是一粒台灣蕃薯子
阮欲返來自己的所在
阮是勇敢的台灣兵仔

請你還阮一個名