經過幾个路權倡議團體長期拍拚，交通部總算佇頂禮拜 9 月 30 號中晝 12 點開始進行蘇花改通行大型重型機車（251C.C.以上）試辦六個月，第一工開放就有超過一千台的車友來鬥鬧熱，整體來講車友攏有守規矩照步來，行車過程嘛無事故發生。
隔工大部分的媒體只有報導公路總局所提供有五十幾件機車違規的新聞，毋過有幾若个車友就佇面冊社團內底貼影片反應，拄著四輪駕駛違規超車、逼車、閃大燈等等，行車無保持車 kah 車中間 50 米安全距離，閣連紲 12 公里逐 oo-tóo-bái 尻川䫌綴牢牢，甚至對 pa-khú-mí-lah 就看會著後車足倚近；車友呼籲，這款汽車的危險駕駛行為，應該攏愛計入去檢核。
公路總局統計，10 月 2 號至 3 號是開放了後第一个假日，2 號蘇花改南向有 741 台、北向 429 台，3 號蘇花改南向有 435 台、北向有 573 台，大型重機車流量大約占蘇花改總車流量 5~7%，只有少數騎士因為對相關行車規定無熟，無小心駛到路肩 kah 未保持安全距離。
公路總局第四區養護工程處南澳交控中心提醒，大型重機駕駛人行駛蘇花改路段時，應該 ài 開大燈、遵守速限、kah 前車保持 50 公尺行車安全距離，磅空內 ài 行駛左側車道，禁止行駛路肩、超車、仝車道併行等危險駕駛行為；公路總局表示，蘇花改沿線已經設置 82 處自動偵測設備 kah 幾若位科技執法設備，毋過這款「科技執法」猶原有侵害隱私、人權 kah 資訊安全等疑慮，近年一直受著路權團體質疑。
試辦期間委託評估單位以抽樣方式，觀測 kah 檢核磅空內的秩序、行為、安全 kah 環境等指標，並分析評估開放大型重型機車通行敢有妥當，試辦開放通行路段：
蘇澳至東澳段(台9線104K+130~113K+420)、
南澳至和平段(台9線124K+640~145K+061)、
和中至和仁段(台9線148K+840~154K+149)。
PeoPo 討論區
回應文章建議規則：